Manehando pa e Maestro

Te Ora E Bin

Ta difísil pa nos komprendé kompletamente e relashon ku nos Dios, e Kreador di universo, ke tin ku nos sernan humano. (E mero idea di dje ta asombroso!) “Mira ki tipo di amor e Tata a otorgá na nos, ku por yama nos yunan di Dios!” (1 Juan 3:1, NKJV). Of manera Ellen G. White a skibi: “Kualke dignidat humano por igualá esaki? Ki posishon mas haltu nos por okupá ku pa yama nos e yunan di e Dios infinito? . . . Kualke honor di mundu por igualá esaki?”— God’s Amazing Grace, p. 341. Ta solamente e skuridat di e mundu kargá ku piká akí ta pone nos keda sin apresiá kompletamente e status duná na nos den Hesus.

Sinembargo, si nos no ta kuidadoso, e atrakshon i e kosnan di mundu lo hala nos for di Kristu. E Palabra di Dios ta informá nos di e tentashonnan i atrakshonnan di Satanas. “Ma esnan ku ta deseá di ta riku ta kai den tentashon i un trampa, i den hopi plasernan loko i dañino ku ta hoga hende den destrukshon i perdishon. Pasobra amor pa plaka ta un rais di tur tipo di maldat, pa kua algun hende a desviá for di e fe den nan goloseria, i a traspasá nan mes ku hopi doló” (1 Tim. 6:9, 10, NKJV).

Señor, sinembargo, ta duna nos direkshon riba kon gana plaka i us’é di forma sabí i no lag’é ta algu ku, manera Pablo a spièrta. por hiba na “destrukshon i perdishon”. Den e mas ku dos mil versíkulonan den e Skrituranan ku ta trata ku plaka i poseshonnan i nos aktitut pa ku nan, Dios ta duna instrukshon práktiko riba kon biba ariba di e tenshonnan di bida i pa manehá den formanan finansieramente fiel loke ku a duna nos.

Den e lèsnan di e kuartal akí nos lo studia e ideal di Dios den nos relashon kunE i mira klaramente kon nos por desaroyá un konfiansa asina profundo ku nos lo permanesé fiel na djE, asta ora nos no por kumpra ni bende. (Lesa Rev. 13:17). Pero e tipo di fe akí no ta bin di awe pa mañan; ora nos manehá fielmente loke Dios a duna nos, nos por ta prepará, asta awor, pa loke sea bin den nos direkshon.

Dios ta Esun ku e rekursonan, i ora nos traha huntu kunE, E ta permití nos atendé ku nan p’E. Ta propósito di e Salbador pa sernan humano, purifiká i santifiká, lo ta su man yudadó. Pa e gran privilegio akí, laga nos duna danki na E “ku a libra nos di e poder di skuridat, i a trasladá nos pa e reino di Su Yu stimá, den Kende nos tin redenshon pa medio di Su sanger, asta pordon di pikánan” (Kol. 1:13, 14).

Dios Su konseho na Su yunan a traves di e hòmber sabí, Salomon, ta: “Honra Señor ku bo poseshonnan, i ku e promé frutanan di tur bo oumento” (Prov. 3:9, NKJV). E konseho akí ta apropiá pasobra “Bo ta digno, o Señor, di risibí gloria i honor i poder; pasobra Bo a krea tur kos, i pa medio di Bo poder nan ta eksistí a ser kreá” (Rev. 4:11, NKJV).

For di un perspektiva meramente sekular, nos ta biba den tempunan hopi desafiante i yen di tenshon. Sinembargo, nos kosmovishon kristian ta duna nos konfiansa i speransa segun ku nos ta mira e señalnan ku Hesus a duna pa laga nos sa ku e gran klímaks di historia humano, e segundo binida di Kristu, ta mashá serka, asta na porta. Nos ta hasi orashon pa e lèsnan práktiko akí lo profundisá bo fe i konfiansa den Dios i enkurashá bo pa ta un fiel manehadó p’E.